సూర్యుడి నుంచి దూసుకొస్తున్న సౌర తుఫాను.. భూమిపై ప్రభావం ఎలా ఉండబోతోంది?
అక్టోబర్ 11న ఆకాశంలో Northern Lights – అసలు అరోరా అంటే ఏమిటి?
BB6 TELUGU NEWS CHANNEL
రేపు ఆకాశంలో అద్భుత కాంతుల విన్యాసం.. సౌర తుఫాను ప్రభావంతో అరోరాలు!
సూర్యుడిలో జరిగే భారీ విస్ఫోటనాల కారణంగా వెలువడే అధిక శక్తి కలిగిన కణాలు, ప్లాస్మా మేఘాలు ప్రస్తుతం భూమి వైపు వేగంగా వస్తున్నాయి. శాస్త్రవేత్తల అంచనా ప్రకారం అక్టోబర్ 11న దీని ప్రభావం ఎక్కువగా ఉండనుంది. దీనినే సౌర తుఫాను లేదా జియో మాగ్నెటిక్ స్టార్మ్ అంటారు.
ఈ కణాలు భూమి అయస్కాంత ఆవరణాన్ని తాకినప్పుడు ఉపగ్రహ సేవలు, జీపీఎస్ సిగ్నల్స్, రేడియో కమ్యూనికేషన్, విద్యుత్ సరఫరా వ్యవస్థలపై స్వల్ప అంతరాయం కలిగే ఛాన్స్ ఉందని అమెరికా అంతరిక్ష వాతావరణ సంస్థ NOAA వెల్లడించింది. ప్రస్తుతం G1-G2 స్థాయి (స్వల్పం నుంచి మధ్యస్థం) తుఫానుగా దీన్ని గుర్తించారు.
అయితే ఈ తుఫానుతోనే ఒక అద్భుతం కూడా ఆవిష్కృతం కానుంది.. అదే అరోరాస్.
సూర్యుడి నుంచి వచ్చే ఈ కణాలను భూమి అయస్కాంత క్షేత్రం నేరుగా భూమిని తాకకుండా ఉత్తర, దక్షిణ ధ్రువాల వైపు నెట్టేస్తుంది. అక్కడ అవి గాలిలో ఉండే ఆక్సిజన్, నైట్రోజన్ అణువులను ఢీకొన్నప్పుడు శక్తి విడుదలై ఆకాశంలో రంగురంగుల వెలుగులుగా మారుతుంది.
ఆక్సిజన్ కారణంగా ఆకుపచ్చ, ఎరుపు రంగులు, నైట్రోజన్ కారణంగా నీలం, ఊదా రంగులు ఏర్పడతాయి.
ఉత్తర ధ్రువంలో కనిపించే వీటిని నార్తర్న్ లైట్స్ (అరోరా బొరియాలిస్) అని, దక్షిణ ధ్రువంలో కనిపించే వీటిని సదరన్ లైట్స్ (అరోరా ఆస్ట్రాలిస్) అని పిలుస్తారు. సాధారణంగా నార్వే, ఫిన్లాండ్, కెనడా, అలాస్కా, అంటార్కిటికాలలో ఇవి కనిపిస్తాయి.
భారత్ వంటి దేశాల్లో ఇవి కనిపించడం చాలా అరుదైన విషయం. కానీ తుఫాను తీవ్రత ఎక్కువగా ఉన్నప్పుడు తక్కువ అక్షాంశ ప్రాంతాల్లో కూడా కనిపించే అవకాశం ఉందని నిపుణులు చెబుతున్నారు. వీటిని చూడాలంటే కాంతి కాలుష్యం లేని చీకటి ప్రదేశం, నిర్మలమైన ఆకాశం ఉండాలి.
సాంకేతికంగా కొంత ఇబ్బంది కలిగించినా, ప్రకృతి సృష్టించే ఈ అద్భుత దృశ్యం మాత్రం చూపరులకు కనువిందు చేయనుంది.
