BB6 TELUGU NEWS CHANNEL
తెలంగాణ హైదరాబాద్: పోలీస్ రిక్రూట్మెంట్ బోర్డును కానిస్టేబుల్ అభ్యర్థులు బురిడీ కొట్టించారు.తప్పుడు సర్టిఫికెట్లతో ఉద్యోగాల్లో చేరారు. నకిలీ బోనఫైడ్ సర్టిఫికెట్లు ఇచ్చిన 59 మందిపై పోలీస్ శాఖ ఫిర్యాదు చేసింది. వీరంతా ఇప్పటికే ఏఆర్, సివిల్ కానిస్టేబుళ్లుగా ఉద్యోగం పొందారు. నకిలీ పత్రాలపై సీసీఎస్ లో ఫిర్యాదు నమోదు చేసిన పోలీసులు దర్యాప్తు చేస్తున్నారు. జాతీయ స్థాయిలో అత్యుత్తమ పోలీసింగ్ నిర్వహిస్తున్న కేటగిరీలో మొదటి స్థానంలో రాష్ట్ర పోలీస్ శాఖ నిలిచింది. ఇలాంటి మంచి పేరుతో ముందుకెళుతున్న తెలంగాణ పోలీస్ శాఖను బురిడీ కొట్టించి.. పోలీస్ శాఖకు మచ్చ తెచ్చేలా తప్పుడు బోనఫైడ్ సర్టిఫికెట్స్ తో ఉద్యోగంలో చేరిన కానిస్టేబుల్స్ పై కఠిన చర్యలకు పోలీస్ శాఖ సిద్ధమైంది.దేశంలోనే తెలంగాణ పోలీస్ శాఖ నంబర్ వన్ స్థానం కైవసం చేసుకున్న సంగతి
తెలిసిందే.ఇండియా జస్టిస్ రిపోర్ట్–2025 ర్యాంకింగ్స్ లో 10 పాయింట్లకు గాను 6.48 పాయింట్లతో టాప్ ప్లేస్సాధించింది. ఏపీ 6.44 పాయింట్లతో రెండో స్థానంలో నిలవగా, 3.36 పాయింట్లతో వెస్ట్ బెంగాల్ చివరి స్థానంలో నిలిచింది. ఈ మేరకు ఆయా రాష్ట్రాల పోలీస్ శాఖలకు ర్యాంకింగ్స్ కు కేటాయించిన ఇండియా జస్టిస్ రిపోర్ట్ -2025 విడుదలైంది. పోలీస్, న్యాయవ్యవస్థ, జైళ్ల శాఖ, లీగల్ ఎయిడ్ సహామొత్తం 32 అంశాలకు సంబంధించి 10మిలియన్ల కంటే ఎక్కువ జనాభా కలిగిన తెలంగాణ, ఏపీ సహా 18 పెద్ద రాష్ట్రాలు, 10 మిలియన్ల లోపు జనాభా గల సిక్కిం సహా 7 చిన్న రాష్ట్రాల్లో సర్వే చేసి ర్యాంకింగ్స్  విడుదల చేశారు.