పహల్గామ్ ఉగ్రదాడి తర్వాత పాకిస్థాన్‌ను భారత్ అన్ని రకాలుగా దూరం పెడుతున్న సంగతి తెలిసిందే. ఇందులో భాగంగా క్రీడల్లోనూ పాకిస్థాన్‌తో ఆడేందుకు భారత్ విముఖత వ్యక్తం చేస్తోంది. అయితే ఇక నుంచి మల్టీ నేషనల్ టోర్నీల్లో పాకిస్థాన్‌తో మ్యాచ్‌ల్లో తలపడాలని భారత ప్రభుత్వం నిర్ణయించింది. మనం తప్పుకోవడం వల్ల పాకిస్థాన్‌కు ఏమాత్రం ఇబ్బంది లేకపోగా.. ప్రయోజనం మాత్రమే వాటిల్లుతుందనే ఉద్దేశంతో భారత్ ఈ నిర్ణయానికి వచ్చింది. దీంతో ఆసియా కప్‌లో పాక్‌‌తో భారత్ మ్యాచ్ ఆడేందుకు ప్రభుత్వం గ్రీన్ సిగ్నల్ ఇచ్చినట్లయ్యింది.

పహల్గామ్ ఉగ్రదాడి ఘటన తర్వాత భారత్, పాకిస్థాన్ మధ్య సంబంధాలు తీవ్రంగా క్షీణించిన సంగతి తెలిసిందే. ఈ దాడిని నిరసిస్తూ.. ఇంగ్లాండ్ వేదికగా జరుగుతోన్న ‘వరల్డ్ ఛాంపియన్స్ ఆఫ్ లెజెండ్స్’ సిరీస్‌ లీగ్ దశలో పాకిస్థాన్‌తో తలపడేందుకు భారత్ నిరాకరించింది. అయితే ఈ రెండు జట్ల మధ్య తొలి సెమీస్ రేపు (గురువారం) జరగాల్సి ఉంది. సెమీఫైనల్లోనూ పాకిస్థాన్‌తో తలపడేందుకు భారత జట్టు ఒప్పుకోకపోతే.. బరిలోకి దిగకుండానే పాకిస్థాన్ ఫైనల్‌ చేరుకుంటుంది. భారత్ మ్యాచ్ ఆడొద్దనే నిర్ణయం దాయాది జట్టుకు వరంలా మారే అవకాశం ఉంది.

ఇరుదేశాల మధ్య దౌత్య సంబంధాలు దెబ్బతినడంతో.. చాలా ఏళ్లుగా పాకిస్థాన్‌తో ద్వైపాక్షిక టోర్నీల్లో భారత్ ఆడటం లేదు. కొంత కాలంగా ఆసియా కప్, వరల్డ్ కప్ లాంటి మల్టీ నేషనల్ టోర్నీల్లోనే పాకిస్థాన్‌తో తలపడుతోంది. లెజెండ్స్ టోర్నీ‌ లీగ్ మ్యాచ్ తరహాలోనే ఆసియా కప్‌లోనూ పాకిస్థాన్‌తో మ్యాచ్‌లను భారత్ బహిష్కరిస్తుందా? అనే అనుమానాలు మొదలయ్యాయి. ఒకవేళ భారత్ ఆడకూడదని నిర్ణయిస్తే.. దాని వల్ల పాకిస్థాన్‌కే లబ్ధి కలిగే అవకాశం ఉంది. కాబట్టి ఆసియా కప్‌లో పాకిస్థాన్‌తో మ్యాచ్‌లో భారత్ ఆడి గెలిస్తేనే బాగుంటుందని ప్రభుత్వ వర్గాలు భావిస్తున్నట్లు తెలుస్తోంది.
ఒలింపిక్స్‌లో పాకిస్థాన్ టీమ్ లేదా అథ్లెట్‌ భారత్‌తో తలపడాల్సి వస్తే.. బరిలో నుంచి తప్పుకొని గెలిచే అవకాశం ప్రత్యర్థికి మనం ఎందుకు ఇవ్వాలి?’ అని ప్రభుత్వ వర్గాలు ప్రశ్నిస్తున్నాయి. అంటే గురువారం పాకిస్థాన్‌తో జరగబోయే సెమీఫైనల్‌తోపాటు ఆసియా కప్‌లోనూ ఆ జట్టుతో తలపడానికి ప్రభుత్వం నుంచి గ్రీన్ సిగ్నల్ వచ్చినట్లే అనుకోవాలి.

వరల్డ్ ఛాంపియన్స్ ఆఫ్ లెజెండ్స్ టోర్నీ విషయానికి వస్తే.. లీగ్ దశలో పాకిస్థాన్‌తో మ్యాచ్ ఆడబోమని ఏడుగురు భారత క్రికెటర్లు స్పష్టం చేశారు. ఏప్రిల్ 22న జరిగిన పహల్గామ్ ఉగ్రదాడికి నిరసనగా ఆటగాళ్లు ఈ నిర్ణయం తీసుకున్నారు. దీంతో ఇరు జట్ల మధ్య జరగాల్సిన లీగ్ మ్యాచ్ రద్దయ్యింది.

దీంతో ఈ టోర్నీ సెమీస్‌తోపాటు ఆసియా కప్‌లో పాక్‌తో ఆడాల్సిన మ్యాచ్‌ల నుంచి భారత్ తప్పుకుంటుందేమో అనే అనుమానాలు వ్యక్తం అయ్యాయి. కానీ సెమీఫైనల్లో పాకిస్థాన్‌తో భారత్ తలపడనుంది. ఆసియా కప్‌లోనూ పాకిస్థాన్‌తో మ్యాచ్‌ల్లో ఆడే విషయమై.. ఏసియన్ క్రికెట్ కౌన్సిల్ భేటీలో బీసీసీఐ సానుకూలంగా స్పందించినట్లు న్యూస్ ఏజెన్సీ ఐఏఎన్ఎస్ వెల్లడించింది.

ఇటీవలే ఏసీసీ ఆసియా కప్ షెడ్యూల్‌ను ప్రకటించిన సంగతి తెలిసిందే. భారత్, పాకిస్థాన్ మధ్య లీగ్ మ్యాచ్‌ సెప్టెంబర్ 14న జరగనుంది. యూఏఈ, ఒమన్ వేదికగా టీ20 ఫార్మాట్లో ఈ టోర్నీ జరగనుంది.